იქ, სადაც მთავარი საფიქრალი მავნებელი მწერია, რომელიც სოფელს მოსავლის განადგურებით ემუქრება, ბაბუა შვილიშვილს დამოუკიდებლად ცხოვრებას ასწავლის. ვალერიან კოტრიკაძე და მისი შვილიშვილი ვაკო დედაქალაქიდან 300 კილომეტრით დაშორებულ სოფელ ბუკნარში ცხოვრობენ.
ვაკოს აუტისტური სპექტრის აშლილობა აქვს, ვალერიანი ყოფილი სამხედროა, რომლისთვისაც წესრიგი ყოველდღიურობის არსებითი ნაწილია. ბაბუას მიზანია, რომ ვაკოს დამოუკიდებელ პიროვნებად ჩამოყალიბებაში დაეხმაროს, ასწავლოს ხელობა, რომ საზოგადოების სრულუფლებიანი წევრი გახდეს.